កំពត៖ ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធិ បានបញ្ជាក់ថា ទីតាំងដែលបានតម្លើងស្លាកកំណត់ល្បឿនលើផ្លូវជាតិលេខ៣ ពីភ្នំពេញមកខេត្តកំពតមាន ៣គោលដៅ ។

តាមរយៈសារអមជាមួយរូបភាពស្លាកកំណត់ល្បឿនរបស់ស្នងការដ្ឋាននគរបាលខេត្តកំពត បង្ហាញឱ្យដឹងថា គោលដៅទី១ គឺនៅចន្លោះបង្គោលគីឡូម៉ែត្រលេខ៩៨-៩៩ ស្ថិតក្នុងភូមិពស់ពង ឃុំនរាយណ៍ ស្រុកឈូក ខេត្តកំពត។

គោលដៅទី២ ស្ថិតនៅចន្លោះបង្គោលគីឡូម៉ែ្រតលេខ ១១៦-១១៧ ក្នុងភូមិត្រពាំងរាំង ឃុំអង្គរមាស ស្រុកដងទង់ ខេត្តកំពត។ រីឯគោលដៅទី៣ ចន្លោះបង្គោលគីឡូម៉ែត្រលេខ១៣២-១៣៣ ស្ថិតក្នុងភូមិព្រៃថ្នង ឃុំព្រៃថ្នង ស្រុកទឹកឈូ ខេត្តកំពត។

ស្នងការនគរបាលខេត្តកំពត គូសបញ្ជាក់ថា នៅពេលអនុវត្តគឺមិនអនុវត្តទាំងបីគោលដៅព្រមគ្នានោះទេ សមត្ថកិច្ចនឹងបែងចែកវេនគ្នាដើម្បីចុះអនុវត្ត សូមបងប្អូនទាំងអស់ជ្រាបជាពត៏មាន។

ជាមួយគ្នានេះ លោក ម៉ៅ ច័ន្ទមធុរិទ្ធិ បានបញ្ជាក់ទៀតថាបន្ទាប់ពីតម្លើងស្លាកកំណត់ល្បឿនរួចរាល់ ប្រសិនពលរដ្ឋឃើញមានមន្រ្ដីនគរបាលរូបណាបាញ់ល្បឿនខុសគោលដៅដែលបានកំណត់នេះ ត្រូវថតឱ្យបានផ្ញើរមកស្នងការ ដើម្បីអនុវត្តវិន័យកងកម្លាំងនគរបាលជាតិ។

លោកថា៖ «នៅពេលចុះបាញ់ល្បឿនប្រសិនបើមន្ត្រីចរាចរណ៏របស់ខ្ញុំណាម្នាក់លបលួចបាញ់ល្បឿនពីក្នុងឡាន ពីក្នុងកម្ពតព្រៃខុសពីគោលការណ៍ណែនាំរបស់ខ្ញុំ សូមថតអោយបានខ្ញុំនិងអនុវត្តវិន័យកងកំលាំងនគរបាលជាតិចំពោះបុគ្គលដែលប្រព្រឹត្តខុស»៕